استغاث مسن مقيم في محافظة الدقهلية، من تعدي زوج ابنته عليه بالضرب، حيث أصابه بعدة طعنات متفرقة في الجسد بواسطة سلاح أبيض؛ بسبب وجود خلافات بينهما.

استغاثة مسن من تعدي زوج ابنته عليه بالدقهلية

وقال المسن إن ابنته تزوجت منذ نحو عام، وخلال هذه الفترة عانت من العديد من المشاكل وكثرة الخلافات مع زوجها، معلقًا: بنتي من يوم ما اتجوزت مشافتش يوم حلو مع جوزها، كان بيعاملها معاملة وحشة وبنتي عايزة تعيش.

وتابع: كنت متفق مع زوج بنتي إنها تيجي ليا كل يوم جمعة عشان أشوفها، بس اللي حصل غير كده ورجع قال لأ هتيجي أسبوع آه وأسبوع لأ.

وأضاف المسن أن في أحد الأيام تفاجأ بتواصل جيران ابنته معه، وأخبروه بأن ابنته تتعرض للضرب والإهانة على يد زوجها، قائلًا: لما كلمت بنتي وسألتها خبت عليا وقالتلي مفيش حاجة، لأنها عايزة تعيش وخايفة عليا لأني مديون بسبب جوازتها.

وأوضح أنه بعد فترة ما أخبرته ابنته أنها تريد الانفصال عن زوجها بسبب كثرة الخلافات بينهما، وعلى الفور تواصل معه وأخبره بهذا الأمر لإتمام إجراءات الطلاق.

وواصل: من يومها وزوج بنتي بيبعتلي تهديدات وعيالي خافوا وقالولي متطلعش من البيت، ومجاش في بالي أبدًا إنه ممكن يعمل معايا كده، واللي حصل إني كنت خارج من البيت وقابلته ولقيته بيقولي تعالى أنا هوريك ورفع عليا السكينة وضربني، قطع دراعي والشرايين فيه ووقعت على الأرض، بقى يطعن فيا وأنا بقوله حرام عليك، بس مرحمنيش وضربني 4 طعنات لحد ما فقدت الوعي.